Sparnaður og aðhaldssemi er dyggð

það getur verið að þessi prentun peninga sé réttlætanleg til að koma í veg fyrir hrun kerfisins þar sem menn halda meira að sér höndum en þarf. Til lengri tíma gengur þetta ekki og við fáum atvinnuleysi og stöðnun. Eitthvað sem vesturlönd hafa verið að reyna að eyða á undanförnum 10 árum með einhverjum galdralausnum.

Neyslumynstur vesturlandabúa er með ólíkindum en allt veldur þetta jú hagvexti. Las það í grein hérna fyrir stuttu að 20-30 prósentum af matvælum væri einfaldlega hent út í tunnu. Þetta er jú hagvöxtur. Það veldur líka hagvexti þegar 2 bílar lenda í árekstri á hellisheiðinni. Menn hafa þjösnast áfram á þeirri forsendu að hægt væri að bruðla endalaust. það nýjasta er hins vegar að menn eru að sjá annan raunveruleik. Þessi raunveruleiki var hækkandi hráefnaverð á heimsmarkaði í seinustu uppsveiflu.

Menn eru að byrja að viðurkenna að hráefni þ.e. olía, málmar og matvæli eru af skornum skammti. Þar má fyrst nefna olíu sem hefur sennileg mestu afleiddu áhrifin. Þar mætti t.d. nefna að með hækkandi olíuverði verður ekki lengur arðvænt að t.d. veiða ýmsa nytjastofna sem við veiðum í dag. Af málmum má m.a. nefna silfur sem er gríðarlega mikilvægur málmur. Hækkun matvælaverðs hefur verið að valda smáuppreisnum um allan heim.

Miklar hækkanir á hrávörum hafa verið að ganga til baka í kreppunni. En það er ljóst að ef skilyrði skapast til hagvaxtar á ný þá hækkar verðið aftur. Til viðbótar bætast svo þessi gróðurhúsaáhrif. 

Allur hagvöxtur á vesturlöndum seinustu 20 ár hefur verið neysludrifinn. Þetta hefur verið gert með þeim hætti að við höfum verið að flytja vinnu til kína. Það er umhugsunar efni að fiskur sé fluttur frá íslandi tíl kína, hann unnin þar og fluttur aftur til vesturlanda. Þetta munstur hefur maður séð víða. Ég vil hins vegar meina að þetta sé eins og að pissa í skóinn sinn. Með því að samþykkja þetta þrælahald í kína og njóta þess í lækkandi vöruverði þá erum við í raun og veru að samþykkja atvinnuleysi framtíðarinnar.

Gríðarlegur hagvöxtur í kína veldur að lokum því að gjaldmiðillinn hækkar í verið með verðbólguáhrifum á vesturlöndum. Í dag er gjaldmiðlinum handstýrt. Ég hef líkt þessu við að seinustu 20 ár höfum við flutt út verðbólgu en við komum til með að flytja hana inn aftur. Til viðbótar má bæta við að fleiri miljarðar manna bætast í millistétt á hverju ári. Þetta fólk kemur til með að keppa við okkur um brauðið.

Sparnaður og aðhaldssemi er dyggð.